شوصون بحشوات مختلفة بالتفاح معسل و لفروماج

السلام عليكم ورحمة الله تعالى وبركاته

العجين نحتاجو 2 كيسان عنبة فورص 2 معالق كبار الزيت بيضة شوية ملح معيلقة صغيرة  سنيدة  خميرة الخبز مذوبة فشوية الحليب الحليب الدافي لجمع العجين

ندلكوها مزيان حتى تولي رطبة  نغطي عليها ترتاح ثلث ساعة

 مين ترتاح العجينة نقسمها لكرات صغار بحجم المشماشة نوضعوهم فبلاطو نغطيو عليهم يرتاحو
(هاد الطريقة الكرات ما تضيعش لينا العجينة )

 نطلق الكرة الاولى بين 2 بلاستيكات
(هاد الطريقة باش منقيسوش العجين بالدقيق وما تيتحلوش ليشوصون )

 بالنسبة لحشو التفاح نكونو موجدينو من قبل ويكون بارد ناخدو 2 تفاحات نقطعوهم مربعات نضيفو ليهم معلقة كبيرة سنيدة شوية لقرفة معلقة كبيرة الزبدة نوضعو الكل فوق النار نغطي عليه حتى يتعسل ( 2 تفاحات  عمارة 4 شوصون الى بغيتو كمية كثر ضاعفو المقادير )

 مين يتعسل التفاح نوضعوه فصفاية يتسقطر مزيان 

نوضعو وسط دائرة العجين التفاح اللي عسلناه قبل

 ثم نطويها على 2 نحاولو لعمارة متقيسش الجوانب باش مين ندخلوهم لفران يطيبو ميتحلوش نضغطو عليهم من الجوانب بلفورشيط بعد ما نكونو وضعناها فالدقيق باش متلصقش فيها العجين

 الشكل الثاني نفس الطريقة الحشو نستعملو قطع فروماج

 نستفوهم فطاوة مدهونة بالزبدة مرشوشة بالدقيق نخليوهم يخمرو من بعد ندهنوهم باصفر البيض مخلط مع شوية نيسكافي وقطيرات الخل
 مين طابو شوصون التفاح دهنت وجههم بشوية العسل وضعت فوقهم اللوز ايفيلي ورشيتهم بالسكر الصقيل

 شوصون الفروماج وضعت فوقهم خطيطات بلكيتشب

 ثم نقدمهم

بالصحة و الراحة