mercredi 6 mars 2013

شكيلات حلوة اللوز

السلام عليكم و رحمة الله تعالى و بركاته
العجين نحتاج 2 كيسان عنبة فورص مع 2 معالق كبار زبدة نبسبسوهم مزيان من بعد نجمع العجين بماء الزهر
درت من العجين حريبلات صغار لفيتهم فلبلاستيك الغذائي و خليتهم باتو فثلاجة باش صبحات ليا لعجينة مطلوقة
فسخت اللوز درتو فبلاطو مفرش بورق المطبخ خليتو بات ليلة كاملة باش ينشف مزيان
طحنتو فالاول بوحدو
من بعد خلطتو مع نصف كمية ديالو سنيدة و ليت طحنتهم المرة الثانية
ضفت ليه شوية زبدة شوية قرفة شوية ماء الزهر و جمعت العجين حتى حصلت على عجين اللوز
و هاهي صبحات واجدة
الشكل الاول طلقت العجين بين 2 بلاستيكات باش متلصقش ليا العجينة درت حربل طويل لفيت العجين و لويت عليه قطعتو بالجرارة او بسطت الحربل شوية و قطعتو بشكل مايل بحال فقاص درت فكل معين تقيبة لوسط بلكيردن قطعت بالمرشم من العجين البني شكل دائرة مشنفة ثم جمعتها عطاتني شكل وريدة حطيتها فتقب و لوريقات لصقتهم فجنابها بابيض البيض و الصور توضح
الشكل 2
درت وجهها فابيض البيض ثم فاللوز مهرمش نقشتها من الجناب بلمنقاش
الشكل 3 طلقت العجين ابيض فوقو طبقة لوز ثم طبقة لعجينة و قطعتها بمرشم البوفة او طابوري او الوردة كل واحد كيف تايقوليه و لونت شوية العجين باللون احمر عملت منو وريدات صغار لصقتهم فجنب بابيض البيض و حطيت قرنفلة وسطهم
خليتهم باتو ليلة كاملة من بعد طيبتهم على نار مهيلة غي شدو راسهم شوية خرجتهم حيت خص لونهم يبقى ابيض دهنتهم بناباج مخلط مع العسل يكونو مسخنين شوية من قبل و درتهم فكويغطات
بالصحة و الراحة

3 commentaires:

  1. khti tbarkelah 3lik rebi ihajbek

    RépondreSupprimer
  2. بارك الله فيك اختي شكرا لكلامك الطيب الله ينورك

    RépondreSupprimer
  3. mashallah hadchimeziane allah yje3lo lik fi izan al7asanat

    RépondreSupprimer