vendredi 20 décembre 2013

بسطيلة الحوت

السلام عليكم ورحمة الله تعالى وبركاته
 حاجتنا السمك المتوفر فالبيت 
هنا استعملت ميرلان والصول وطريف سمك الصنور وضعتهم فكاسرول فيها لماء ضفت ليهم وريقات موسى شوية ملح ابزار 4 فصوص الثوم  طريف الحامض من طابو وضعتهم يتصفاو
 و الما ديالهم رطبت فيه الشعرية الصينية 
 نوضعو لكروفيت فمقلاة فوق النار نضيفو ليه شوية زيت لعود (اومعلقة كبيرة الزبدة )شوية ملح ابزار 
مين يتشحر نوضعوه على جنب ولمرق ديالو
 نضيفو ليه كلمار مقطع شوية ملح ابزارزيت لعود
 يتشحر لمدة 5 دقايق باش ميقصاحش 
 نوجدو شرمولة الحوت ربيع مقطع مدقوق نضيفو ليه 4 فصوص الثوم اللي تصلقو مع الحوت عصير الحامض (او حامض مصير مقطع رقيق ) 2 معالق مطيشة الحك شوية ابزار تحميرة كمون سكين جبيرشوية صلصة حارة معلقة كبيرة صلصة الصوجا نخلط الكل 
 نضيفو لحوت شوية شرمولة واللي بقات  نوضعوها فمقلاة فالمرق اللي تشحر فيه لكلمار نضيف ليهم شعرية صينية مقطعة قبيصة الملح نخلطوها مزيان مع شرمولة نوضعوها فوق النار تشحر شوية 
 ثم نضيفو ليها زيتون اخضر مقطع
 هادو الحشوات ديالنا من بعد ما وجدووبردو
 ناخدو ورقة البسطيلة نفرشوها فاطار مربع او دائري نلصقو بين كل ورقة بخليط الدقيق مع الماء
 نوضعو كطبقة اولى الشعرية الصينية
 فوقها الحوت
 ثم لكروفيت مع لكلمار 
 نحك من فوق فروماج احمر
 ونبداو نرجعو جوانب الورقة و ديما نلصقو بخليط الدقيق المخلط مع الماء نوضعو من فوق ورقة البسطيلة 
 نزولو الاطار ونلصقوها من الجوانب هنا دهنت الربع الاكبر بشوية الماء مخلط مع الدقيق و شديت ورقة البسطيلة لويتها وقطعتها بلمقص وضعتها فوق الخليط باش تشد فلبسطيلة دهنتها باصفر البيض مخلط مع شوية نيسكافي ندخلوها للفرن
 هذا شكلها مين طابت
 ونقدمها على هذا الشكل 
 هادو بسيطلات فرديين 
 الحشو استعملت نفس الطريقة والحوت حسب المتوفر عندنا فالبيت والصور توضح باقي المراحل





 هنا استعملت ورقة البسطيلة فالبيت طريقة تحضيرها في هذا الرابطhttp://oumdouae.blogspot.com/2013/07/blog-post_9799.html




 هذا الشكل لبسيطلات مين تعمرو
 نوضعوهم فطاوة مغلفة بورق المطبخ ندخلوهم للفرن غي يبداو يصفارو ندهنو وجههم بشوية الزبدة باش يجيو محمرين (او ندهنوهم قبل ما ندخلوهم الفرن بصفار البيض مخلط مع نيسكافي)

 ثم نقدمهم على هذا الشكل
بصحتكم او راحتكم

2 commentaires:

  1. تبارك الله عليك أختي منى، بغيت غير نسولك هنا مثلا معندهم أنواع السمك بحالنا وإلا كان كيكون عامر بالشوك،واش ممكن ندير البسطيلة ونكتفي بالقمرون والسلمون ؟

    RépondreSupprimer
  2. الله يبارك فيك اختي فاطمة الزهراء ربي يخليك
    نعم اختي استعملي اللي متوفر عندك فالدار حتى الى كانت الكمية قليلة يمكن ليك ضيفي للكل فالاخر علبة صغيرة الحوت الابيض المصبر
    الى حتاجيتي شي حاجة مرحبا

    RépondreSupprimer