jeudi 27 juin 2013

شباكية باللوز و الزنجلان

السلام عليكم ورحمة الله تعالى وبركاته
 هاد الطريقة خديتها من عند الاخت نادية اليازمي ضيفة حلقة شهيوات بلادي جات غزالة و متتفرتتش فالقلي الله يجازيها كل خير 
المقادير اللي استعملات الاخت نص كيلو فورص كاس صغير اتاي مخلط زبدة وزيت رومية وزيت لعود الزنجلان مطحون معلقة صغيرة النافع مطحون ومغربل
 انا عبرت بكاس لعنبة استعملت 4 كيسان ونص فورص كاس مخلط زبدة وزيت رومية و بلدية  زلافة مخلطة باللوز و الزنجلان محمرين ومطحونين معلقة صغيرة النافع قبيصة الملح سبقتها فالاول 
 فايناء او قصعة نوضعو الدقيق الزنجلان اللوز النافع ملح نخلط الكل 
 نبداو نضيفو بشوية بشوية الزيت اللي مخلط مع الزبدة
 نحاولو نخدموه بيدينا مزيان 
 نضغط على الخليط بيدينا نغطيو عليه ندخلوه للثلاجة ليلة كاملة
 من بعد نضيفو ليه بيضة مع شوية زعفران شعرة شوية خميرة معجونة منكتروش معلقة صغيرة لخل نخلطو لكل 
 ونبداو نجمعوها بماء الزهر يكون دافي وحنا تنخلطو غي بيدينا بلامندلكوها حتى ترطاب وتنسجم العناصر مع بعضياتها 
 هذا شكل العجين
 نقسموه كويرات نوضعوهم فبلاطو نغطيو عليهم ببلاستيك يرتاحو شوية 
 نطلقو العجين بمدلك فوق سطح مرشوش بالدقيق واخا الاخت مستعملاتش الدقيق الى كانت عندكم مكينة لورقة طلقوها بالمدلك دوزوها فالنمرة 1 ثم فالنمرة 4  تولي رقيقة ثم تقطع بالجرارة مثل الموضح فالصورة كل مربع نعمل فيه 4 شرطات 
مين نجيو نشبكوها نقلب المربع ونبداو نشبكو بالطريقة المعروفة نهز الشريط الاول بين الاصابع نخلي الثاني ثم نهز الشريط 3 نخلي 4 ثم نقلبها 
 لتعطينا هذا الشكل نضغط عليها من الجوانب باصبعنا ونضغط عليها شوية من الوسط كيف قالت الاخت باش طيب مقادة 
 نوضعوهم فبلاطو يتشمعو مزيان 
 ونبداو نقليوهم فزيت سخون وتكون عافية مهيلة  مين نبدا نقلي نرمي الشباكية فمقلة نوضعو فوقها لمغرفة غي بشوية باش تشد راسها  بما هزيت الشباكية 2  ندفع الاولى فالمقلة نفس الطريقة حتى نساليو فعلا هاد طريقة رائعة للمحترفين شكرا للاخت الله يجازيها بيخير
من بعد القلي نوضعوهم فالعسل اللي ضفنا ليه راس معلقة مسكة حرة
نوضعوها فصفاية او شبيكة تسقطر من لعسل 
 ثم نرشهم بالزنجلان و اللوزمحمر ومهرمش ونقدمهم 
بالصحة و الراحة

4 commentaires:

  1. salam mouna lah yeaatek seha khti fsaraha chehitina fhad chebakiya sahla wmafihach lmakadir bezef brhi nssewlik wach louz mefssoukh wela blekchour welah yehefdek tesslamina

    RépondreSupprimer
  2. شكرا اختي الهام لكلامك الطيب
    بالنسبة اللوز مفسخ وناشف ومحمر فلفران
    بالصحةوالراحة مرحبا

    RépondreSupprimer
  3. Merci beaucoup pour cette recette je vais l essayer in cha allah

    RépondreSupprimer
  4. بالصحة و الراحة اختي
    جربيها او ردي عليا لخبار

    RépondreSupprimer