mercredi 26 juin 2013

كيفية تحضير سلو او السفوف

السلام عليكم ورحمة الله تعالى وبركاته 
عواشركم مبروكة باش متمنيتو ان شاء الله 
اللهم بارك لنا في شعبان و بلغنا رمضان في احسن الاحوال 


 طريقتي فتحضير سلو نحتاج 
كيلو الزنجلان مغسول مزيان ومنشف منقي ومحمر فلفران 
رابعة حبة حلاوة منقية ومحمرة فلفران 
رابعة النافع منقي ومحمر فلفران 
 نص كيلو اللوز مقلي من بعد ما فسختو و طلقتو فبلاطوفوق منديل  نشف ليلة كاملة 
 كيلو كاوكاو مقلي نفس طريقة اللوز 
 رابعة زريعة لكتان منقية محمرة فلفران
 3 دراهم يللان منقي
 3 معالق كبار قرفة
 نطحنو الزنجلان انا تنحاول غي دور لماكينة نحيدو تنخليه مهرمش شوية نفس الطريقة كاوكاو و اللوز حتى هما مهرمشين 
 نطحنو النافع حبة حلاوة يللان نغربلوهم نضيفيهم لزنجلان اللوز كاوكاو نطحنو زريعة لكتان نضيفوها هي ولقرفة 
 بالنسبة للدقيق استعلمت كيلو وربع 
درتو فطاوة دخلتو لفران 
 مين يبدا يتحمر من الوجه
 نحركوه بمغيرفة لخشب و نوليو نرجعوه مرة ثانية لفران نفس العملية 
 حتى يبان لينا تحمر 
 فبانيو نغربلو الدقيق نضيف ليه المكونات اللي طحنت نضيف ليهم 2 كيسان ماعامرينش سكر كلاصي راس معلقة مسكة حرة شوية كوزة محكوكة قبيصة الملح 
 نخلطو الكل مزيان ثم نضيفو 3 معالق كبار عسل حر( حسب الرغبة )
 نخلطوها مزيان ونبقاو نضيفو الزيت شوية بشوية حتى تجمع كل واحد كيف تبغيها ناشفة شوية او راوية 
هنا مين تخلطات 
 نديروها فسوبيرة 
هادو بعض الاشكال لتقديم سلو نتمنى بعجبوكم 



4 commentaires:

  1. 3afak zite wach zit el 3oud

    RépondreSupprimer
  2. السلام عليكم اختي فالتخلاط باش ما بغيتي تخلطيها بزيت لعود او زبدة مذوبة مبيتة او مصفية من الماء او الزيت رومية او لعسل الى درتيه نقصي السكر الصقيل بالصحة و الراحة اختي و عواشرك مبروكة

    RépondreSupprimer
  3. merci a khti pour la reponse w allah ye3tik assaha 3la chhiwatek rai3in bezzaf
    3afak ri zit roumia wach khassha tib w merci pour la reponse w samhi liya khti sade3tek
    3wacher moubarika allah ydekhleha bessaha w ssalama

    RépondreSupprimer
  4. العفو اختي بالصحة و الراحة حتى الى بغيتي تخلطي الزيت الرومية ولبلدية و تكون باردة ماشي مشكل الدنيا هانية اختي الى حتاجيتي شي حاجة مرحبا

    RépondreSupprimer