طارطات صغار بكريمة الحامض و لمورانغ

السلام عليكم ورحمة الله تعالى وبركاته

المقادير نحتاج نص رابعة زبدة صفر بيضة  نحتفظ بابيض البيض للمورانغ 2 معالق كبار سنيدة معلقة صغيرة خميرة الحلوى الدقيق حسب الخليط تقريبا رابعة 

مين تجمع العجين نعملوها فبلاستيك غذائي ندخلوها للثلاجة  ترتاح ربع ساعة

لتحضير كريمة الحامض غادين نحتاجو نص كاس عصير الحامض ربع كاس الماء معلقة زبدة 2 معالق كبار سنيدة بيضة قشور حامضة محكوكة معلقة صغيرة  كريم باتسيير

نوضعو لكل فكاسرول نخلطوهم مزيان نوضعوهم فوق نار مهيلة مع التحراك حتى تعقاد 

مين ترتاح العجين نعملو منها كرات كبار شوية نوضعوهم فمول شكل وريدات مدهون بالزبدة ومرشوش بالدقيق نبسطوهم  مزيان باش ياخدو شكل وريدات وميجيوش غلاظ 

 نتكوهم بلفورشيط ندخلوهم لفرن يكون سخون من قبل نقصو عليهم لعافية 

مين يطيبو نخليوهم حتى يبردو و نعمروهم بكريمة لحامض 

نطرب ابيض البيض اللي حتافظنا بيه نضيف ليه ساشي فاني ومعلقة سكر الصقيل حتى يولي بحال الثلج

نوزعوه فوق طارطات نشرطوه من فوق بلفورشيط ندخلوهم لفران تكون لعافية من لفوق غي يتحمرو شوية نخرجوهم 

نرشهم من فوق بقشور الحامض  ونقدمهم

بالصحة و الراحة